जग्गा नामसारी सिफारिसमा घुस लिने वडा सचिव बिरुद्ध बिशेष अदालतमा आरोप-पत्र दायर

२७३ पटक पढिएको

बारा-  जग्गा नामसारी सिफारिसको लागि सेवाग्राहीसँग घुस लिने वडा सचिव बिरुद्ध बिशेष अदालतमा आरोप-पत्र दायर गरिएको छ।

बाराको कोल्हवी नगरपालिका ११ मा कार्यरत वडा सचिव (ना.सु.) विनोद प्रसाद साहले जग्गा नामसारी सिफारिसको लागि सेवाग्राहीसँग घुस मागेका थिए।

घुस रकम मागेको भन्‍ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोगको हेटौडाको टोलि खटिई गएको थियो। टोलीले निज साहलाई सेवाग्राहीबाट तीन हजार पाँच सय रुपैयाँ घुसरिसवत लिइसकेको अवस्थामा माघ १० गते नियन्त्रणमा लिएको थियो ।

निजले गरेको उक्त कार्य भ्रष्टाचार निवारण ऐन, २०५९ को दफा ३ को उपदफा (१) को कसुर भएकोले निज वडा सचिव (ना.सु.) विनोद प्रसाद साहलाई बिगो तीन हजार पाचँ सय रुपैयाँ कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को खण्ड (क) बमोजिम सजाय हुन मागदावी लिई आज बिशेष अदालत, काठमाडौंमा आरोप-पत्र दायर गरिएको छ।