कावासोतीका वडास्तरीय बालक्लवका पदाधिकारीहरूलाई तालिम प्रदान

४२५ पटक पढिएको

कावासोती:  जागृति बाल तथा युवा सरोकार नेपाल र कावासोती न.पा  ३ को संयुक्त आयोजनामा वडास्तरीय बालक्लवका पदाधिकारीहरुलाई तालिम प्रदान गरिएको छ।

वडा ३ का कार्यबाहक वडाअध्यक्ष ऋषिराम बस्ताकोटीले बालबालिकाहरुको अधिकार संरक्षण र सम्बर्द्धनमा नगर र वडाले बालमैत्री स्थानीय शासनको लागि पहल गरिराखेको र त्यसको प्रबर्द्धनको लागि बालबालिका लक्षित विभिन्न कार्यक्रमहरु समेत सञ्चालन गरिराखेको बताउनुभयो।

बालबालिकाहरुले पनि आफ्ना हक अधिकार प्राप्ति सँगै जिम्मेवारी र कर्तव्यमा समेत ध्यान दिनुपर्ने र तालिमहरुबाट सिकेका विषयहरु सही रुपमा कार्यान्वयन गर्न समेत अनुरोध गर्नुभयो ।

किशोरी शसक्तिकरण कार्यक्रम अन्तर्गत कावासोती नगरका सवै वडामा गठन भएका वडास्तरीय बालक्लव सञ्जालका पदाधिकारीहरु र अन्य बालबालिकाहरुको क्षमता अभिबृद्धीको लागि तालिमहरु सञ्चालन गरिराखेको आयोजक संस्थाकी राधादेवी बोटेले बताईन्।

तालिममा बालअधिकारको ऐतिहासिक पृष्ठभुमी, नेपालको संविधानमा बालअधिकार र यसको अवस्था, किशोरकिशोरीका सवालहरु, बालमैत्री स्थानीय शासनको बारेमा सेसन सञ्चालन गरिएको सहजकर्ता वि.क.ले बताईन्।

बेला बेलामा तालिमहरु सञ्चालन गर्ने हो भने बालबालिकाहरुले नयाँ विषय सँगै बालमैत्री अभियान र किशोरी मैत्री बाताबरणको लागि सहयोग पुग्ने तालिममा सहभागीहरुले बताए।

तालिममा वडास्तरीय बालसञ्जालका पदाधिकारीहरु र अन्य विभिन्न टोल र विद्यालयमा रहेका बालक्लवका प्रतिनिधीहरु सहित ४५ जनाको सहभागिता रहेको थियो ।