बिजुलीको पोल सार्न घुस लिने सव-स्टेशन प्रमुख बिरूद्ध बिशेष अदालतमा आरोप-पत्र दायर

२६० पटक पढिएको

काठमाडौँ:  बिजुलीको पोल सार्नका लागि सेवाग्राहीसँग घुस लिएको आरोपमा नेपाल विद्युत प्राधिकरण काठमाडौं ग्रिड महाशाखा पाटन ललितपुरमा कार्यरत सव-स्टेशन (प्रमुख) सोमप्रसाद पहाडीलाई बिशेष अदालत काठमाडौंमा आरोप-पत्र दायर गरिएको छ।

नेपाल बिद्युत प्राधिकरणले गाडेको बिजुलीको पोल सार्नको लागि सेवाग्राहीसँग १ लाख ४० हजार घुस मागेको भन्ने निवेदनका आधारमा अख्तियार दुरुपयोग अनुसन्धान आयोग, टंगालबाट खटिई गएको टोलीले निज पहाडीलाई सेवाग्राहीबाट घुस लिइसकेको अवस्थामा पौष २९ गते नियन्त्रणमा लिएको थियो ।

पहाडीले जिर्ण भएको काठको पोल बदली गर्नका लागि लाग्ने खर्च व्यहोर्ने दायित्व प्राधिकरणको हुँदा हुँदै पनि बिजुलीको पोल सार्ने प्रयोजनार्थ सेवाग्राहीसँग घुस लिएको पुष्टि हुन आएकोले निज सोमप्रसाद पहाडीको उक्त कार्य भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुर भएकोले निजलाई बिगो कायम गरी सोही ऐनको दफा ३ को उपदफा (१) र दफा ३ को उपदफा (१) को खण्ड (घ) बमोजिम सजाय हुन मागदावी लिई अख्तियार दुरुपयोग अनुसन्धान आयोग ऐन, २०४८ को दफा १८ र ३५ एवं भ्रष्टाचार निवारण ऐन, २०५९ को दफा ३६ बमोजिम आज बिशेष अदालत, काठमाडौंमा आरोप-पत्र दायर गरिएको अख्तियार दुरुपयोग अनुसन्धान आयोगका प्रवक्ता श्याम प्रसाद भण्डारीले जानकारी गराउनुभयो।