बेङ्कटेश भगवानको ३० औँ ब्रम्होत्सवको अवसरमा ग्राम परिक्रमा

३१५ पटक पढिएको

गैँडाकोट, नवलपुर। गैँडाकोट नगरपालिकाको वडा नं. १ मा रहेको रहेको श्रीमदरामानुज वेद विद्याश्रममा बेङ्कटेश भगवानको ३० औँ ब्रम्होत्सव बिहिबार सम्पन्न भएको छ।

आइतवारदेखि सुरू भएको ब्रम्होत्सव आज सम्पन्न भएको  मन्दिरका महन्त श्यामकृष्ण पौडेलले बताउनुभयो ।

वि.सं. २०४० को दशकमा स्थापना भएको मन्दिरमा कलियुगका देवताका रुपमा मानिने बेङ्कटेश भगवानको पूजा अर्चना हुने गर्दछ । बिहिबार १०८ घडा कलशबाट भगवानको अभिषेक गरिनुका साथै विश्वशान्ति स्थापना र विश्वकल्याणका लागि ब्रम्होत्सव गरिएको पौडेलले बताउनुभयो ।

बम्होत्सवको समापनका दिन बेङ्कटेश भगवानलाई लक्ष्मीहरि परवासुदेव मन्दिर, लक्ष्मी नृसिंह दिव्य धाम, निम्बार्क दर्शन केन्द्र राधाकृष्ण मन्दिरका साथै ग्राम परिक्रमा गराइएको थियो।

भगवानलाई नारायणी दर्शन एवं स्नान समेत गराइएको छ । भगवानलाई पाल्कीमा बोकेर विधिपूर्वक विभिन्न मठमन्दिरहरुको परिक्रमा गराइएको हो ।

१२ महिनाको १२ पटक आरती एवं भोग लगाई, विभिन्न द्रब्यहरु समावेश गरिएका विभिन्न कलशले भगवानको स्नान गराइएको थियो।

आइतबारबाट सुरु भएको ब्रम्होत्सवमा पहिलो दिनमा पूर्वाङ्ग तथा भगवत् आराधना रहेको थियो। पञ्चदिवशीय ब्रम्होत्सव कार्यक्रममा देशभरबाट आचार्य विद्वान तथा भक्तजनहरुको बाक्लो उपस्थिति थियो । गैँडाकोट नगरपालिका उपप्रमुख विष्णुकुमारी कंडेलले पनि समापन कार्यक्रममा सहभागि भइ भगवानको दर्शन गर्नुभएको छ ।

ब्रम्होत्सवको पाँच दिन पाठ पारायण तथा विभिन्न आचार्य विद्वानहरुबाट प्रवचन भएको थियो ।