म्यादी प्रहरीमा यही साता भर्ना खुल्दै

३८२ पटक पढिएको

सरकारले आगामी ३० वैशाखको स्थानीय तहको निर्वाचनमा एक लाख म्यादी प्रहरी खटाउन स्वीकृति दिएको छ ।

नेपाल प्रहरीले एक लाख १८ हजार २३१ म्यादी प्रहरीका लागि प्रस्ताव गरेपनि अर्थ मन्त्रालयले एक लाख जनाका लागि मात्र बजेट स्वीकृत गरेको हो ।

गृह मन्त्रालय स्रोतका अनुसार अर्थ मन्त्रालयले ४० दिनका लागि  म्यादी प्रहरी खटाउन स्वीकृति दिएको छ ।

म्यादी प्रहरीका लागि एक साताको तालिम सञ्चालन हुनेछ। प्रहरीका अनुसार म्यादी प्रहरी भर्नाका लागि यही साता दरखास्त आह्वान गर्ने तयारी छ ।

म्यादी प्रहरी हुन १८ वर्ष पूरा गरी ५४ वर्ष ननाघेको हुनुपर्नेछ । साधारण लेखपढ गर्न जान्ने र कुनै राजनीतिक दलको सदस्य नभएको हुनुपर्नेछ।

२०७४ सालको निर्वाचनमा पनि ९९ हजार ९५५ म्यादी प्रहरी भर्ना गरिएको थियो ।