नेपाली सेनाको क्याप्टेन हुँ भनी ठगी गर्ने व्यक्ति पक्राउ

२८५ पटक पढिएको

पोखरा: नेपाली सेनाको क्याप्टेन हुँ भनी झुक्याई ठगी गर्ने व्यक्ति पोखराबाट पक्राउ परेका छन्।

पक्राउ पर्ने ओखलढुङ्गा मानेभञ्ज्याङ गा.पा. ५ घर भई कास्की पोखरा १० अम्मरसिंहचोक बस्ने वर्ष ३८ को अर्जुन कटुवाल भन्ने धन बहादुर परियारलाई रहेको जिल्ला प्रहरी कार्यालय कास्कीले बताएको छ।
आफू नेपाली सेनाको क्याप्टेन रहेको र हाल मिसनको लागि विदेशमा रहेको, आफूसँग सेनाको ठूला ठूला मानिससँग चिनजान छ भनी ठगी गर्दै हिडेका थिए।

सिंगापुर पुलिस, नेपाली सेनाको सेकेण्ड लेप्टेन र सिपाही पदमा नोकरी लगाई दिन सक्छु भनि फेसबुकमा कुराकानी गरी झुक्याई ३ जना व्यक्तिहरूबाट नौ लाख पचहत्तर हजार एक सय चालिस रुपैयाँ ठगी गरेका थिए।

उनको साथबाट नेपाली सेनाको सहसेनानी अर्जुन कटुवालको नाममा बनाएको नक्कली परिचयपत्र, नेपाली सेनाको सहसेनानी पदको दर्ज्यानी चिन्ह र अर्जुन कटुवाल नामको चेसप्लेट लगाएको नेपाली सेनाले प्रयोग गर्ने चुस्ता १ सेट, हरियो ज्याकेट, बेल्ट, दाप सहितको खुकुरी, तुमलेट, सेनाको लोगो भएको गेमड्रेस र ट्रायकसुट, विभिन्न व्यक्तिहरूको नामको उपसेनानी पदको उम्मेदवारहरूको फाराम, सिपाही पदको परिचय पत्र, खालि परिचयपत्रहरू र बा ८४ प ६९८८ नम्बरको मो.सा. सहित पक्राउ गरी ठगी, आपराधिक बिश्वासघात तथा आपराधिक लाभ (एक्सटर्सन) सम्बन्धी कसूरमा सम्मानित कास्की जिल्ला अदालतबाट दिन सात (७) म्याद थप गरी अनुसन्धान प्रकृया अगाडी बढाइएको कास्की प्रहरीले बताएको छ।