नवलपुरमा फागुन महिनामा सम्बन्ध बिच्छेदका ५६ मुद्धा दर्ता

८७२ पटक पढिएको

नवलपुर अनलाइन। नवलपुर जिल्ला अदालतमा फागुन महिनामा मात्रै सम्बन्ध बिच्छेदका ५६ नयाँ मुद्धा दर्ता भएका छन्।

फागुन महिनामा दर्ता भएका १५६ मुद्धा मध्ये सबैभन्दा धेरै सम्बन्ध बिच्छेदका ५६ रहेको नवलपुर जिल्ला अदालतका श्रेस्तेदार महेन्द्र प्रसाद पौड्यालले नवलपुर अनलाइनलाई जानकारी दिनुभयो।

फागुनमा लिखत बदर २४, जालसाजी १०, अंश/अंशचलन/अंशनामसारी/ अंशबण्डा २७, चेक अनादर ४, मानाचामल ८, सवारी ज्यान २, लागुऔषध २, ज्यानमार्ने उद्योग २, आपराधिक उपद्रोजन्य २, चलन चलाई २, जबर्जस्ती करणी १, सवारी अंगभंग १, लिखत गालि बेइज्जती १, निषेधाज्ञा १, वन अतिक्रमण/वन पैदावार १, लुटपिट १, मिलापत्र १, कर्तव्य ज्यान १, डाँका चोरी ६, लेनदेन २, फैसला बदर १ र करार सम्झौता सम्बन्धी मुद्धा गरि १५६ नयाँ मुद्दा दर्ता भएका हुन्।

त्यस्तै चालु आर्थिक वर्षको आठ महिनामा ९३२ वटा नयाँ मुद्धा दर्ता भएका छन।

साउनदेखि फागुन मसान्तसम्म ९३२ वटा मुद्धा दर्ता भएका हुन्। जसमध्ये दुनियावादी देवानी ६८२, सरकारवादी फौजदारी १६४ र दुनियावादी फौजदारी ७९ सुरू मुद्धा रहेका छन्।

दुनियावादी देवानी १, सरकारवादी फौजदारी ३ सहित ४ पुनरावेदन मुद्धा र रिट (निषेधाज्ञा) ३ गरि जम्मा ९३२ मुद्धा रहेको पौड्यालले बताउनुभयो।

गत बर्षबाट जिम्मेवारी सरि आएका १०५० मुद्धा छन्। चालु आर्थिक वर्षको आठ महिनामा दर्ता भएका ९३२ नयाँ मुद्धा सहित हाल नवलपुर जिल्ला अदालतमा १९८२ मुद्धा रहेको पौड्यालले बताउनुभयो।

जसमध्ये ८१२ वटा मुद्धा फैसला भएका छन भने  ११७० वटा मुद्धा अनुसन्धानको क्रममा रहेको अदालतले जनाएको छ।

गत बर्षबाट जिम्मेवारी सरी आएका मुद्धाहरू मध्ये दुनियावादी देवानी ६६१, सरकारवादी फौजदारी २१६ र दुनियावादी फौजदारी गरि १७१ सुरू मुद्धा रहेका छन्।साथै दुनियावादी देवानी १, सरकारवादी फौजदारी १ गरि जम्मा २ पुनरावेदन मुद्धा रहेको अदालतले जनाएको छ। नवलपुर अदालतमा हाल १ बर्ष नाघेका २६१ मुद्धा छन्।

थुनुवा भएका मुद्धा संख्या १६२, १८ महिना नाघेको मुद्धाको संख्या ११३, दुईबर्ष नाघेको मुद्धाको संख्या १६६ रहेका छन्। बिभिन्न मुद्धामा सम्बद्ध व्यक्तिबाट ११० बर्ष कैद भुक्तान गर्न बाँकी छ भने १ करोड ६५ लाख ३५ हजार ६ सय ९६ रूपैँया जरिवाना असुल हुन बाँकी छ।चालु आर्थिक वर्षको आठ महिनाको मुद्धा फर्छयौट ४०.९७ प्रतिशत रहेको पौड्यालले जानकारी दिनुभयो।