भरतपुर महानगरको मेयरमा माओवादीकी रेनु दाहाल विजयी

६१४ पटक पढिएको

काठमाडौं । चितवन जिल्लाको भरतपुर महानगरपालिकाको मेयरमा गठबन्धनवाट मेयरको साझा उम्मेदवार बनेकी नेकपा माओवादीकी रेनु दाहाल र गठबन्धनवाट नै उपमेयरको साझा उम्मेदवार बनेका चित्रसेन अधिकारी विजयी भएका छन् ।

यसअघि पनि भरतपुर महानगरको मेयर रहेकी दाहाल दोस्रो पटक विजयी भएकी हुन् । कुल मतदाता १ लाख ८५ हजार भएको भरतपुरमा जम्मा मत १ लाख २७ हजार ८३९ मत खसेको थियो ।

दाहालले ५२ हजार ३० मत प्राप्त गरेर विजयी भएकी छन् भने प्रमुख प्रतिद्वन्द्वी एमालेका विजय सुवेदीले ३९ हजार ५८१ मत ल्याएका छन् । मेयर पदमा दाहालले सुवेदीभन्दा १२ हजार ४४९ मत बढी ल्याएए विजयी भएकी हुन् । स्वतन्त्र उम्मेदवार जगन्नाथ पौडेलले १४ हजार​ ७२८ मत प्राप्त गरेका छन् ।

यस्तै उपमेयरमा कांग्रेसका चित्रसेन अधिकारीले ५२ हजार ८०३ मत प्राप्त गरेर विजयी भएका छन् । उपमेयरमा एमालेले समर्थन गरेको राष्ट्रिय प्रजातन्त्र पार्टी (राप्रपा) की उम्मेदवार हिमला गुरुङको ३० हजार ६१२ प्राप्त गरेकी छन् । अधिकारीले प्रतिद्वन्द्वी गुरुङभन्दा  २२ हजार १९१ बढी मत ल्याएका छन् ।