“भोला दाहाल स्मृति राष्ट्रिय विकासकर्मी पुरस्कार” चितवनका विश्वास प्रजालाई

४९३ पटक पढिएको

चितवन जिल्लाको कोराक गाउँका ३० वर्षे युवा विकासकर्मी विश्वास प्रजा (चेपाङ) लाई २०७९ सालको ‘भोला दाहाल स्मृति राष्ट्रिय विकासकर्मी पुरस्कार’ प्रदान गरिने भएको छ ।

नेपाल सहभागीमूलक कार्य समूह (नेपान) द्वारा हालै स्थापित उक्त पुरस्कार उहाँलाई पहिलोपटक प्रदान गरिन लागेको हो ।

नेपानको २८ औँ वार्षिक साधारणसभाको अवसरमा भदौ २५ गते शनिवार काठमाडौँमा आयोजना हुने कार्यक्रममा उहाँलाई उक्त पुरस्कार प्रदान गरिने छ ।

पुरस्कारको राशी दश हजार रहेको छ र सोका साथ एक सम्मानपत्र पनि रहने छ ।
विश्वास प्रजा (चेपाङ) ले नेपालको शिक्षा विकास तथा सहभागीमूलक संरक्षण एवम् जैविक विविधता विकासमा एक उर्जाशील युवाको तहबाट विभिन्न संस्थामा रही विशेष योगदान पुर्‍याएबापत उहाँलाई नेपानले सम्मान गर्न लागेको हो ।

उहाँलाई सम्मानस्वरूप पुरस्कारका अतिरिक्त नेपानको वार्षिक (साधारण) सदस्यतासमेत निःशुल्क प्रदान गर्नेछ । उहाँ हाल विश्व वन्यजन्तु कोष (डब्लूडब्लूएफ) मा विशेषज्ञ पदमा कार्यरत हुनुहुन्छ र काठमाडौँ विश्वविद्यालयबाट एमफिल तहमा अध्ययनरत समेत हुनुहुन्छ ।