‘प्रसिद्ध कणेल स्मृति विकास लेखन पुरस्कार’ २०७९ डा. चापागाईँलाई

७९९ पटक पढिएको

नेपाल सहभागीमूलक कार्य समूह (नेपान) बाट हरेक वर्ष प्रदान गरिने ‘प्रसिद्ध कणेल स्मृति विकास लेखन राष्ट्रिय पुरस्कार’ २०७९ डा. चण्डीप्रसाद चापागाईँलाई प्रदान गरिने भएको छ ।

चापागाईँ सहभागीमूलक विकास तथा सकारात्मक सोच पद्धति प्रवर्द्धन विषयमा कलम चलाई थुप्रै पुस्तक तथा आलेखहरू प्रकाशन गर्नुभएको छ।

उहाँले नेपाली तथा अंग्रेजी भाषामा करिब आधा दर्जन पुस्तक प्रकाशन गर्नुभएको छ भने विकास व्यवस्थापन विषयका एक अनुभवी प्रशिक्षकसमेत हुनुहुन्छ ।
नेपानको २८औँ वार्षिक साधारणसभाको अवसर पारेर भदौ २५ गते शनिवार काठमाडौँमा उहाँलाई उक्त पुरस्कार प्रदान गरिनेछ । पुरस्कारको राशि १० हजार रुपैयाँ रहेको छ । साथै पुरस्कारका साथ नेपानले एक सम्मानपत्रसमेत प्रदान गर्नेछ ।
वि.सं. २०७४ असोज २४ गते अमेरिकामा स्नातक तहमा अध्ययन गर्दै गरेका आफ्ना सुपुत्र प्रसिद्धको असामयिक निधन भएश्चात उनको स्मृतिमा उनका बाबा–आमा चेतनाथ कणेल तथा सीता भण्डारी कणेलले २०७४ चैत महिनामा नेपानमा एक लाख रुपैयाँको अक्षयकोष राखी सोही रकमको ब्याजबाट हरेक वर्ष नेपान सदस्य वा गैरसदस्य विकास– लेखकहरूलाई सम्मान गर्ने प्रचलन छ ।

डा. चापागाईंसमेत सो पुरस्कारबाट हालसम्म सम्मानित हुनुहुने जम्मा पाँचजना विकास–लेखक हुनुहुन्छ । २०७५ मा पहिलोपटक सहप्राध्यापक गम्भीरबहादुर हाडालाई सम्मान गरिएको थियो।

२०७६ मा द्वन्द्वविद् डा. विष्णुराज उप्रेतीलाई, २०७७ मा प्रशासन तथा व्यवस्थापनविद् डा. मानबहादुर विश्वकर्मालाई र २०७८ मा कृषि एवम् ग्रामीण विकासविद् प्रा.डा. नरविक्रम थापालाई प्रदान गरिएको थियो ।