‘प्रेमगीत ३’ आजबाट देशभर प्रदर्शनमा

२१३ पटक पढिएको

काठमाडौं । ‘प्रेमगीत ३’ आज शुक्रबारबाट देशभरका हलहरूमा प्रदर्शनमा आउने भएको छ ।

हिन्दी भाषामा समेत डब भएको यो फिल्म शुक्रबारबाटै भारतका सिनेमा हलमा समेत प्रदर्शनमा हुने छ । तर, नेपालमा भने घटस्थापनाबाट मात्र हिन्दी डब लाग्नेछ ।

फिल्मको अग्रिम बुकिङले पनि फिल्मले कमाईमा रेकर्ड बनाउने संकेत गरिसकेको छ । फिल्मले शुक्रबार र शनिबार ठूलो कमाई गर्नेमा दुईमत छैन । देशभरका अधिकांश सिंगल हल कब्जा गरेको फिल्मले मल्टीप्लेक्सहरुमा सर्वाधिक शो पाएको छ ।

छेतेन गुरुङ र सन्तोष सेनले निर्देशन गरेको यस फिल्ममा प्रदीप खड्का, क्रिस्टिना गुरुङ, शिव श्रेष्ठ, मनिष राउत, अनुभव रेग्मी, सम्वृद्धि शाही ठकुरी, सुनिल थापा, सन्तोष सेन, माओत्से गुरुङ, पुस्कर कार्की, प्रेम पुरी, लक्ष्मी वर्देवा, योगिशा खत्रीलगायतका कलाकारको अभिनय छ । ‘प्रेमगीत ३’ बाट क्रिस्टिनाले अभिनेत्रीको रुपमा डेब्यू गर्दैछिन् । फिल्मलाई राजेश श्रेष्ठले खिचेका हुन् ।

निर्माण कम्पनीले चलचित्र विकास बोर्डमा कर चुक्ताको कागजात पेश नगरेकाले फिल्मको हिन्दी डबको सेन्सर रोकिएको छ ।