जबर्जस्ती करणी मुद्दामा ७१ वर्षिय बृद्ध पक्राउ

१५८ पटक पढिएको

जबर्जस्ती करणी मुद्दाका प्रतिवादीलाई जिल्ला प्रहरी कार्यालय कास्कीले पक्राउ गरेको छ । पक्राउ पर्नेमा पोखरा २८, माझठानाका ७१ वर्षीय तारानाथ तिवारी हुन् ।

आजभन्दा साढे ३ वर्षअघि २०७६ साउन ७ मा तिवारीले अपांगता भएकी नावालिकालाई जबर्जस्ती करणी गरेको अभियोगमा मुद्दा खेपेका थिए । निजलाई पुर्पक्षका लागि कारागार कार्यालय कास्कीको थुनामा राखिएकोमा जिल्ला अदालत कास्कीले २०७७ असोज २७ को फैसलामा उनले सफाइ पाएका थिए ।

तर उच्च अदालतमा परेको पुनरावेदन निवेदनमा भने अदालतले सुरु अदालतको मुद्दा उल्टाई निज तिवारीलाई १९ वर्ष ३ महिना कैद, १० हजार जरिवाना तथा पीडित नावालिकालाई २ लाख रुपैयाँ क्षतिपूर्ति भराउने फैसला गरेको थियो । उच्चले गएको वैशाख १४ सो फैसला गरेकोमा प्रतिवादी तिवारी हालसम्म फरार थिए । उनलाई कास्की प्रहरीले पुस २२ मा उनकै घरबाट पक्राउ गर्न सफल भएको जिल्ला प्रहरी कार्यालय कास्कीका प्रवक्ता प्रहरी निरीक्षक ज्ञानबहादुर खड्काले जानकारी दिए ।