डोलेश्वर मन्दिरका चारै ढोका भक्तजनका लागि खुल्ला

४१७ पटक पढिएको

भक्तपुर । भक्तपुरको सिपाडोलस्थित केदारनाथको शिर डोलेश्वर मन्दिरमा आज शनिबार भक्तजनहरुका लागि खुल्ला गरिएको छ ।

शनिबार महाशिवरात्री पर्व परेकाले बिहानैदेखि भक्तजनका लागि मन्दिरका चारै ढोका खुल्ला गरिएको केदारनाथको शिर डोलेश्वर महादेव संरक्षण तथा विकास समितिले जनाएको छ ।

यो मन्दिर भक्तजनहरुका लागि अक्षय तृतीया, भदौ ६ गते र शिवरात्रीका दिन मात्र खुल्ला गरिन्छ । अन्य दिन पुजारीहरुले पूजाआजा गरिदिने व्यवस्था रहेको छ ।

समितिको वार्षिक कार्यक्रम अनुसार आज भक्तजनहरु आफैं मन्दिरभित्र प्रवेश गरी पूजाअर्चना गर्न पाउने भएकाले पनि भक्तजनहरुको भीड लागेको समितिका महासचिव हरिशरण बस्नेतले जानकारी दिनुभयो ।

पर्वका समयमा हुने विभिन्न सुरक्षा अवस्थालाई ध्यान दिँदै प्रहरी तथा सवारी ब्यवस्थापनका लागि ट्राफिक प्रहरी परिचालन भएका छन् ।

महाशिवरात्रिका लागि भारत तथा नेपालका विभिन्न स्थानबाट साधुसन्त आएका छन् ।