क्रिकेट विश्वकप लिग टुः नेपाल आज पपुवा न्यु गिनीसँग भिड्दै

१३८ पटक पढिएको

आईसीसी क्रिकेट विश्वकप लिग टु अन्तर्गत नेपाल, यूएई र पपुवा न्यु गिनी (पीएनजी) सम्मिलित शृङ्खला आजदेखि यूएईमा सुरु हुँदैछ। शृङ्खलाको पहिलो खेलमा आज नेपालले पीएनजीको सामना गर्नेछ।

खेल नेपाली समय अनुसार पौने १२ बजे दुबई इन्टरनेसनल क्रिकेट स्टेडियममा सुरु हुनेछ। यो शृङ्खलामा पीएनजीको मैदानमा हुनुपर्ने भए पनि प्राविधिक कारणले यूएईमै खेलाउन लागिएको हो।

घरेलु मैदानमा  लिग टु को शृङ्खला जितेकाे नेपाल उच्च मनाेबलका साथ यूएई पुगेकाे छ। स्कटल्याण्ड र नामिबिया सम्मिलित लिग टु को शृङ्खलामा नेपालले सबै चार खेल जितेकाे थियाे। जितकाे शृङ्खला कायम राख्ने दाउमा नेपाल छ। तर उत्कृष्ट लयमा रहेका नेपालका लेग स्पीनर सन्दिप लामिछाने भने यो शृङ्खलामा हुने छैनन्। नाबालिग बलात्कार मुद्धामा धरौटीमा रिहा भएका लामिछानेलाई अदालतले देशबाहिर जान रोक लगाएको छ।