प्रदेश १ को नाम ‘कोशी’, आज सार्बजनिक बिदा

६६४ पटक पढिएको

प्रदेश संरचना कार्यान्वयनमा आएको पाँच वर्षपछि प्रदेश नम्बर १ को नामाकरण गरिएको छ। प्रदेश सभाको बुधबार बसेको बैठकले ‘कोशी प्रदेश’ नामाकरण गरेको हो।

सत्तारुढ नेकपा (एमाले)का सांसद रामबहादुर मगरको प्रस्ताव तथा एमालेकै सांसदद्वय विदुर लिंथेप र निरन राईको समर्थनमा प्रदेश सभा सचिवालयमा दर्ता गरिएको प्रदेश नामकरणको प्रस्ताव दुई तिहाई बहुमतले पारित भएको हो।

प्रदेश सभामा भएको मतविभाजनबाट प्रदेशको नाम कोशी प्रदेश राख्नुपर्छ भन्ने प्रस्ताव दुई तिहाई बहुमतले पारित भएको सभामुख बाबुराम भण्डारीले घोषणा गर्नुभयो।

कोशी नामको पक्षमा ८२ मत परेको छ भने विपक्षमा चार मत परेको छ। बैठकमा चार जना सांसद अनुपस्थित रहनुभयो। प्रदेश सरकारका स्वास्थ्य मन्त्री तथा जनता समाजवादी पार्टीकी सांसद निर्मला लिम्बू र राप्रपाकी सांसद सरिता बजगाई मतविभाजनको जनाउ घण्टी बजिसकेपछि ढिलागरी पुगेका कारण प्रदेश सभाभित्र प्रवेश नपाउँदा मतदानमा सहभागी हुनुभएन। कुल ९३ सदस्यीय प्रदेश सभा बैठकमा ८९ जना उपस्थित थिए।

दोस्रो कार्यकालमा प्रदेश नम्बर १ को नाम कोशी प्रदेश नामाकरण भएको खुसीयालीमा आज बिहीबार सार्वजनिक बिदाको घोषणा गरिएको छ ।