गोपी सापकोटाको उपन्यास ‘चिसो बाफ’ प्रीलञ्च हुँदै

२२६ पटक पढिएको

भरतपुर, १४ चैत । लेखक गोपी सापकोटाको नयाँ उपन्यास ‘चिसो बाफ’को आउँदो बुधबार `प्रीलञ्च´ हुने भएको छ ।

नेपाली साहित्यमा प्रयोगधर्मी नाटककारका रुपमा स्थापित सापकोटाको यो दोस्रो उपन्यास हो । कार्यक्रम सम्पूर्ण किताब नारायणगढमा हुन लागेको सञ्चालक लेखराम सापकोटाले बताए ।

प्रीलञ्चसँगै लेखकसँग पुस्तकका बारेमा छलफल र पाठकहरूका लागि पुस्तकमा लेखकको हस्ताक्षर कार्यक्रम पनि राखिएको छ। उपन्यासकार सापकोटाका अनुसार `चिसो बाफ’ शारीरिक स्वास्थ्य बिग्रँदै गएकी एक युवती र मानसिक स्वास्थ्य बिग्रँदै गएको एक युवकबीचको प्रेम र सम्बन्धको कथा हो ।

मानिसको मस्तिष्कको धागो कतै गुजमुजिएपछि अलमलिने जीवनको लय र त्यही धागो कतै चुँडिएपछि भत्कने जीवनको समन्वय ‘चिसो बाफ’का विषय हुन्´, सापकोटाले भने – `कथानकमा कल्पनाशीलता र संरचनामा नवीन प्रयोग ‘चिसो बाफ’का विशेषता हुन्, आख्यान पढ्ने पाठकलाई फरक स्वादको उपन्यास दिने कोसिस गरेको छु ।

नाटक लेखनमा आफ्नै खाले प्रयोग गर्ने गरेका गोपीले यो उपन्यासमा विशेष प्रयोग गरेको बताए । सापकोटाको पहिलो उपन्यास ‘काँचो कागज’ ले राम्रो चर्चा पाएको थियो । उनका कविता, नाटक र उपन्यास गरी दश कृति प्रकाशित छन् । गैंडाकोट घर भएका सापकोटा बेलायतमा बसोबास गर्छन् । `चिसो बाफ´लाई कलम प्रकाशनले प्रकाशन गरेको हो । पुस्तकको विमोचन कार्यक्रम भने आगामी शनिबार काठमाडौंमा राखिएको छ ।