महानगर प्रमुख रेनु दाहालद्धारा बाईपास सडकमा वृक्षारोपण

२९३ पटक पढिएको

चितवन । भरतपुरको बाईपास रोड अन्तर्गतको विशालचोकदेखि मालपोतचोकसम्मको डिभाईडरमा वृक्षारोपण गरिएको छ । शुक्रबार एक कार्यक्रमका बीच भरतपुर महानगरपालिका प्रमुख रेनु दाहालले वृक्षारोपण गर्नुभएको थियो।

वृक्षारोपण कार्यक्रमलाई सम्बोधन गर्दै महागनर प्रमुख दाहालले भरतपुरका बनेका सयौँ किलोमिटर सडकलाई सौन्दर्यीकरणलाई प्राथमिकतामा राखेको उल्लेख गर्नुभयो । भरतपुर महानगरपालिकाले एक घर दुई विरुवाको नीति नै लिएकाले भरतपुरलाई हेर्न लाएक सहर, हरियाली सडक, वातावरणमैत्री सहरका रुपमा अगाडि बढाउन अग्रसर रहेको बताउनुभयो ।
भरतपुरमा राष्टिय वन, सामुदायिक वन भएपनि स्वच्छ, हराभरा सहरका रुपमा परिचत गराउन सहर क्षेत्रमा पनि वृक्षारोपणलाई विषेश महत्व दिएको उहाँको भनाई छ ।
भरतपुर बाइपास रोडमा भएका डिभाईडरमा भरतपुर महानगरपालिका, सडक डिभिजन कार्यालय र राष्ट्रपति चुरे तराई मधेश संरक्षण विकास समितिको सहकार्यमा सिजियम र बौगेनवेलियाको ३ फिट अग्लो विरुवाहरु लगाईने छ । सिजियम र बौगेनवेलिया ३ मिटरको फरकमा रोपिने छ भने त्यसमा कार्पेठग्रास लगाईने जनाइएको छ ।
कार्यक्रमलाई सम्बोधन गर्दै राष्ट्पति चुरे तराई मधेश संरक्षण विकास समितिका अध्यक्ष डा.किरण पौडेलले यस आर्थिक वर्षमा भरतपुरसहित २४ पालिकामा सहर केन्द्रीत वृक्षारोपण कार्यक्रम सञ्चालन भएको जानकारी दिनुभयो ।
सहरमा वृक्षरोपण गर्नाले ४देखि ५ डिग्रीसम्म तापक्रम न्युनिकरण गर्न सकिने अध्ययनले देखाएकाले सहरी क्षेत्रमा वृक्षरोपणलाई प्राथामिकता दिनुपर्ने  ‍‌औल्याउनुभयो । बढ्दो जनसंख्याको वृद्धिसँगै वृक्षरोपणलाई पनि बढाउदै सहरको सौन्दर्यकरण गरी हरित सहर निर्माणमा जुट्नुपर्नेमा जोड दिनुभयो । विकसित सहरमा कुल बजेटको १५ प्रतिशत रकम हरियाली प्रर्वद्धनमा बजेट विनियोजन गर्ने परिपाटी रहेको उहाँको भनाई थियो ।