पुँजी बजारको सेटिङ भत्काउने गरि छानबिन हुन्छ: प्रचण्ड

१८४ पटक पढिएको

काठमाडौं । धितोपत्र बजारमा सेटिङ मार्फत भएको भ्रष्टचारको छानविन हुने भएको छ । प्रधानमन्त्री पुष्पकमल दाहालले नक्कली शरणार्थी प्रकरणमा मात्र नभइ पुँजी बजारको सेटिङका बारेमा पनि छानबिन हुने बताएका हुन । बिहीबार प्रतिनिधिको प्रश्न उत्तरमा सहभागी हुँदै सभामा सांसद सर्वेन्द्रनाथ शुक्लाले गरेको प्रश्नको जवाफ दिँदै प्रधानमन्त्री दाहालले सबै खालको भ्रष्टाचार अन्त्य गर्ने गरी अघि बढेको बताए ।

उनले भन, ‘भ्रष्टाचारलाई कुनै पनि छुट दिइनुहुँदैन । सबै भ्रष्टाचार अन्त्य गर्ने दृढ इच्छाका साथ अघि बढेका छौं ।  अन्य तमाम ठूला घटनाको छानबिन गर्ने र सम्पत्ति शुद्धीकरण र राजस्वमा भएका ठूला चलखेल र पुँजी बजारको सेटिङ भत्काउने गरि छानबिन हुन्छ ।’

त्यस्तै, सांसद शिशिर खनालको लाल आयोगको प्रतिवेदन कहिले सार्वजनिक हुन्छ भन्ने प्रश्नको जवाफमा  प्रधानमन्त्री दाहालले लाल आयोगको प्रतिवेदन अहिले तत्काल सार्वजनिक नगर्न सर्वोच्च अदालतले फैसला गरेको हुनाले अदालतबाट फुकुवा हुनेबित्तिकै उक्त प्रतिवेदन खुला हुने जानकारी दिए । उनले विषयवस्तुको गाम्भिरयतालाई बुझेर विश्वका अन्य देशमा पनि केही समय सार्वजनिक नगर्ने गरेको यथार्थ पनि सदनलाई जानकारी गराए ।