तलबमै मासिक करोड खर्च भएपछि नगरपालिकाले हटायो ६९ कर्मचारी

२०७ पटक पढिएको

मासिक एक करोड भन्दा बढी रकम तलबमै खर्च हुन थालेपछि राजविराज नगरपालिकाले शुक्रवारदेखि लागु हुनेगरी दैनिक तथा मासिक ज्यालादारीमा कार्यरत ६९ जना कर्मचारी हटाएका छन् । शुक्रवार प्रमुख प्रशासकिय अधिकृत धर्मनाथ जोशीले एक सूचना प्रकाशित गरी नगरपालिकाका ६९ जना दैनिक तथा मासिक ज्यालादारीमा कार्यरत कर्मचारी हटाइएको जनाएका छन् ।

उनले अघिल्लो दिन विहीवार नगरकार्यापालिकाको बैठकले खर्च घटाउन यस्तो निर्णय गरिएको र सो निर्णय शुक्रवारदेखि कार्यान्वयनमा आएको स्पष्ट पारेका छन् । नगरपालिकाले सरसफाई कर्मचारी बाहेक सबै दैनिक तथा मासिक ज्यालादारीमा काम गर्ने कर्मचारीलाई हटाएको प्रमुख प्रशासकिय अधिकृत जोशीले बताए ।

यसरी सेवाबाट हटाइएका मध्ये नगरपालिकामा २२ वर्षदेखि काम गर्दै आएका कर्मचारीदेखि पूर्व जनप्रतिनिधिदेखि वर्तमान जनप्रतिनिधिद्वारा दैनिक तथा मासिक ज्यालादारीमा राखिएका कर्मचारी समेत परेका छन् । राजविराज नगरपालिकामा विभिन्न विभाग र फाँटका गरी झण्डै २ सय ५० कर्मचारी छन् ।

समयमा तलब नपाउँदा कर्मचारीले घर खर्च चलाउन समेत समस्या हुने गरेको भन्दै बेला–बेलामा धर्ना र विरोध प्रदर्शन गर्दै आएका थिए । राजश्व बाडफाँडबाट आउने रकमले तलब खुवाई कर्मचारीलाई नगरपालिकाले थामथुम पार्दै आएको थियो । नगरपालिकाका लेखापाल शत्रुघन दासका अनुसार पालिकाका कर्मचारी, शिक्षा, स्वास्थ लगायतको कर्मचारीको तलबमा मात्रै मासिक १ करोड २५ लाख रुपैयाँभन्दा बढी खर्च हुने गरेको छ ।

राजविराज नगरपालिकाका प्रमुख भिमराज यादव विरुद्ध अख्तियार दुरुपयोग अनुसन्धान आयोगले विशेष अदालतमा आरोप पत्र दायर गरेपछि उनी अहिले निलम्बित अवस्थामा छन् । नगरप्रमुख निर्वाचित हुनु अघिनै उनीमाथि एक निर्माण कार्यमा अनियमितताका आरोप लागेको थियो ।

जसकारण उपप्रमुख इसरत परवीनले कार्यवाहक प्रमुख भएर पालिका चलाइरहेका छन् । उनले बजेटको अभावको कारण बढ्दो खर्च धान्न कठिन भएपछि कार्यपालिका बैठकले कर्मचारी कटौती गर्ने निर्णय गरेको बताइन । यता वर्षौदेखि काम गर्दै आएका आफुहरुलाई एक्कासी हटाएर नगरपालिकाले अन्याय गरेको कर्मचारीहरुले गुनासो पोखेका छन् । ‘आफुहरुसँग कुनै छलफल र जानकारी समेत नदिई एक्कासी सेवाबाट हटाइएको सूचना जारी गरेर अन्याय गरिएको छ, सेवाबाट हटाइएका एक कर्मचारीले भने– पुनः नियुक्ति नगरिए कडा आन्दोलनमा उत्रिन बाध्य हुनेछौ ।

एकातिर कर्मचारी अभावले नगरपालिकाको दैनिक कामकाज प्रभावित बन्दै गएको बेला एकै पटक ठुलो संख्यामा कर्मचारीलाई सेवाबाट हटाउँदा यसले थप जटिलता उत्पन्न गराउने नगरवासीको भनाई छ । राजधानी दैनिकबाट