मुक्तिनाथ कृषि कम्पनीको आईपीओ सर्वसाधारणमा बाँडफाँट

११७ पटक पढिएको

काठमाडौं । मुक्तिनाथ कृषि कम्पनी लिमिटेडले सर्वसाधारणमा विक्री गरेको आईपीओ बाँडफाँट गरेको छ । विक्री प्रबन्धक एनआईएमबि एस क्यापिटल लिमिटेडले मंगलवार विहान आईपीओ बाँडफाँट कार्यक्रम सम्पन्न गरेको हो । सर्वसाधारणका लागि कम्पनीले मङ्सिर ८ गतेदेखि १२ गतेसम्म आईपीओ जारी गरेको थियो ।

कम्पनीले नेपाल धितोपत्र बोर्डबाट जारी पूँजी ७० करोड रुपैयाँको २० प्रतिशतले हुन आउने १४ करोड रुपैयाँ बराबरको शेयर निष्कासन गर्न अनुमति पाएको थियो । कम्पनीले पहिलो चरणमा १० प्रतिशतले हुन आउने १ करोड ४० लाख रुपैयाँ बराबरको प्रतिशेयर १०० रुपैयाँ अंकित मूल्यका १ लाख ४० हजार कित्ता शेयर वैदेशिक रोजगारीमा रहेका नेपालीहरूका लागि निष्कासन गरी बाँडफाँट गरिसकेको छ ।

दोस्रो चरणमा कम्पनीले ४२ हजार कित्ता शेयर कर्मचारीहरू र ७० हजार कित्ता शेयर सामूहिक लगानी कोषलाई बाँडफाँट गरी ११ लाख ४८ हजार कित्ता शेयर सर्वसाधारणका लागि बाँडफाँट गरेको हो । सर्वसाधारणमा निष्कासन गरेको शेयर खरीदका लागि १३ लाख ४० हजार १९९ जनाले आवेदन दिएको जानकारी विक्री प्रबन्धकले गराएको छ । यी मध्ये १२ लाख ७४ हजार ५६७ जनाको आवेदन मात्र रितपूर्वक भएकाले स्वीकृत गरेको भनाई पनि विक्री प्रबन्धकको छ । मागभन्दा बढी आवेदन परेकाले गोलाप्रथाको माध्यमबाट १ लाख १४ हजार ८०० जनामा १० कित्ताका दरले आईपीओ बाँडफाँट गरिएको हो ।

मुक्तिनाथ कृषि कम्पनीले कृषक तथा कृषि व्यवसायीहरूको उत्पादन र उत्पादकत्व वृद्धिको लागि आवश्यक गुणस्तरीय उत्पादनका साधनहरू, जस्तै  मल, बीउ, विषादी, औजार उपकरणसहित अनुसन्धान, विकास प्रविधि हस्तान्तरण, प्रशोधन र मूल्य अभिवृद्धिको साथै कृषि सुनिश्चितता गरी राष्ट्रिय र अन्तरराष्ट्रिय बजारीकरण सम्बन्धी क्रियाकलापहरू गरिरहेको छ ।