एक्सपर्ट भरतपुर मेयर्स कपः वाल्मीकिको लगातार दोस्रो जित

११८ पटक पढिएको

चितवन, एक्सपर्ट भरतपुर मेयर्स कप अन्तरविद्यालय क्रिकेट प्रतियोगिताको लिगमा समुह ‘ए’को वाल्मीकि शिक्षा सदनले लगातार दोस्रो जित निकालेको छ । प्रतियोगिताको समुह ‘बी’ को विश्वप्रकाश माविले भने पहिलो जित हात पारेको छ ।

हिजोको पहिलो खेलमा विश्वप्रकाशले प्रभात मावि शुक्रनगरलाई ४ विकेटले तथा वाल्मीकिले मावि गंगानगरलाई ८७ रनको फराकिलो अन्तरमा हराएको हो ।

भरतपुर–१५ स्थित निर्माणाधिन गौतम बुद्ध अन्तर्राष्ट्रिय क्रिकेट रंगशालाको नमुना मैदानमा भएको पहिलो खेलमा टस हारेर ब्याटिङको निम्तो पाएको प्रभात मावि १२.३ ओभरमा अलआउट हुँदै ६२ रनमा रोकियो । १० ओभरमा ५२ रन जोडेर ५ विकेट गुमाएको प्रभातले १० रन जोड्दा अन्तिम ५ विकेट गुमाउँदै अलआउट भयो । निशान भुषालले सर्वाधिक १७ रन बनाए । मनिष भट्टराईले १३ रन जोडे ।
प्रभातको इनिङ्स ध्वस्त बनाउनेक्रममा मुन्ना पटेलले ५ र रेशम काफ्लेले ३ विकेट लिए । ६३ रनको झिनो लक्ष्यसहित जवाफी ब्याटिङ थालेको विश्वप्रकाशले १२।२ ओभरमा ६ विकेट गुमाएर पूरा गर्यो ।

विश्वप्रकाशलाई जिताउन मुन्ना पटेल १० रनमा नटआउट रहे । बलिङमा अभिषेक लामिछाने र अभिनाश सापकोटाले समान २ विकेट लिए । ३.३ ओभर बलिङ गर्दै १२ रन खर्चिएर ५ लिएका मुन्ना पटेल खेलको प्लेयर अफ द म्याच बने ।

यस्तै अर्को खेलमा १ सय ४५ रनको लक्ष्य पछ्याएको मावि गंगानगर १६.४ ओभरमा ७७ रन जोड्दा अलआउट भयो । सर्वाधिक १४ रन बनाएका ओपनर जयप्रकाश यादव एभेन्जल थापाको बलमा आदर्श दुलालद्वारा समातिए ।

अर्का ओपनर राज विश्वकर्मा पनि १३ रन बनाउदा एभेन्जलकै बलमा बोल्ड हुँदै पेभेलियन फर्किए । गंगानगरलाई सस्तैमा समेट्नेक्रममा एभेन्जल थापाले ४ तथा माधव सापकोटा र संयम लामिछानेले समान २ विकेट लिए ।

त्यसअघि टस हारेर पहिला ब्याटिङको निम्तो पाएको वाल्मीकिले निर्धारित २० ओभरमा ४ विकेट गुमाउदै १ सय ६४ रनको योगफल बनायो । वाल्मीकिको इनिङ्स मध्यक्रममा युमन कडेल र अर्पित शाहीले सम्हालेका थिए । ४३ बलमा ६ चौकासहित सर्वाधिक ४८ रन जोडेका युमन अभय अधिकारीको बलमा लङ्ग अफमा उर्वर तामाङद्वारा समातिए । ४१ बल खेल्दै अर्पित शाहीले ३६ रन जोडे ।
बलिङमा अभय अधिकारीले ३ विकेट लिए । खेलको प्लेयर अफ द म्याच युमन कडेल भए । यसैबीच हिजो मावि गंगानगरका ६ जना खेलाडी कारवाहीमा परेका छन् । विद्यालय बाहिरका प्रज्जवल कोइराला, सफल दवाडी र कुशल सुवेदी मैदानमा खेल्न उत्रिएपछी उनीहरु कारवाहीमा परेका हुन् । उनीहरुलाई टिममा आफ्नो नाम दुरुपयोग गरेर स्थान दिने सचिन महतो, अरुन रानामगर र सुजन रानाभाटलाई पनि टेक्निकल कमिटीले कारवाही गरेको हो । मावि गंगानगरले यी खेलाडीहरुको सट्टामा अब कुनै रिप्लेसमेन्ट समेत लिन नपाउने टेक्निकल कमिटीले निर्णय गरेको छ ।
प्रतियोगितामा आज (बुधबार) हुने पहिलो खेलमा इडन गार्डेन इङलिस स्कुल र सनराइज इङलिस स्कुल तथा अर्को खेलमा नारायणी नमुना मावि र लक्ष्मी मावि जगतपुर प्रतिस्पर्धा गर्नेछ ।

भरतपुर महानगरपालिकाको आयोजना, चितवन जिल्ला क्रिकेट संघको सहआयोजना र एक्सपर्ट एजुकेशन एन्ड भिजा सर्भिसेसको मुख्य प्रायोजनमा प्रतियोगिता संचालन भैरहेको छ ।