प्रथम आदिवासी जनजाति सांस्कृतिक तथा व्यापारिक महोत्सवमा ३०० प्रदर्शनी कक्ष रहने

१६७ पटक पढिएको

चितवन । भरतपुर भ्रमण वर्ष–२०२४ को अवसर पारेर नेपाल आदिवासी जनजाति महासङ्घ जिल्ला समन्वय परिषद् चितवनले नारायणी नदी किनारमा ‘प्रथम आदिवासी जनजाति सांस्कृतिक तथा व्यापारिक महोत्सव–२०८०’ गर्ने भएको छ ।

महोत्सव मूल समारोह समितिले आज पत्रकार सम्मेलन गरेर  आगामी चैत ९ गतेदेखि १८ गतेसम्म महोत्सव हुन लागेको जानकारी दिएको हो ।

भरतपुर भ्रमण वर्ष–२०२४ लाई लक्षित महोत्सवमा ३०० प्रदर्शनी कक्ष रहने महासंघ चितवनका अध्यक्ष एवम् मेलाका संयोजक महेन्द्र दुराले जानकारी दिए ।

उनले भने ‘यस संस्थाले भरतपुर महानगरपालिका वडा नम्बर ११ नौरंगेमा २५ धुर जग्गा खरिद गरी आफ्नै भवन निर्माण गरेको छ । अझै पनि भवन पूर्णरुपमा सम्पन्न हुन सकेको छैन । महोत्सवको आम्दानीले भवन निर्माणमा सहयोग पुग्ने अपेक्षा छ ।

आदिवासी जनजातिको भाषा, संस्कृति संरक्षणमा सहयोग पुग्ने महोत्सवले भरतपुर भ्रमण वर्षको प्रबद्र्धनमासमेत टेवा पुर्‍याउने लक्ष्य लिएका छौँ ।”

दैनिकजसो १७ वटा जातीय सांस्कृतिक प्रदर्शनी हुने महोत्सवमा ३०० व्यावसायिक स्टल रहने लक्ष्य राखिएको छ । जसबाट ८० लाख रुपैयाँ खर्च र करिब एक करोड रुपैयाँ आम्दानी हुने लक्ष्य राखिएको पत्रकार सम्मेलनमा जानकारी दिइयो ।

मूल समारोह समितिका संयोजक दूराका अनुसार चितवनमा ४० प्रकारका ४६ प्रतिशत आदिवासी जनजाति समुदायको बसोबास रहेको छ । तीन लाख ३२ हजार भन्दाबढी आदिवासीको बसोबास रहेको चितवनमा पहिलो पटक आयोजना गर्न लागिएको महोत्सवले आदिवासी संस्कृतिको संरक्षणसँगै पहिचानमा समेत सहयोग पुग्ने अपेक्षा लिइएको छ ।

चितवनमा थारू, दराई, कुमाल, तामाङ, बोटे, चेपाङ, मगर, गुरूङ, थकाली, नेवार, दुरा, राई, लिम्बू, भुजेल, ह्योल्मो, बराम लगायतका जनजाति छन् । चितवनमा बसोबास गर्दै आएका आदिवासी जनजाति समुदायको जातिगत गतिविधिलाई अन्तर्राष्ट्रियस्तरमा प्रचारप्रसार गर्नका लागि पनि महोत्सव आयोजना गरिएको आयोजकको भनाइ छ ।

थप समाचार:

नारायणी नदी किनारमा आदिवासी जनजाति सांस्कृतिक तथा व्यापारिक महोत्सव हुँदै