होटल व्यवसायी तथा कर्मचारीहरूको क्षमता अभिवृद्धि गर्न गैंडाकोटमा दुईदिने तालिम हुँदै

५२१ पटक पढिएको

गैँडाकोट । कालिगण्डकी करिडोर अन्तर्गतका होटल व्यवसायी तथा कर्मचारीहरूलाई गैंडाकोटमा “स्वच्छ र पर्यटकमैत्री सेवा प्रवाह सम्बन्धी” दुई दिने  तालिम संचालन हुने भएको छ ।

होटल व्यवसायी  महासंघ गण्डकी प्रदेश र नेपाल पर्यटन बोर्ड गण्डकी प्रदेशको संयुक्त आयोजनामा भोलि देखि संचालन हुने तालिमबारे आज आयोजित पत्रकार सम्मेलनमा जानकारी गराईएको थियो।

तालिम कार्यक्रमको सह आयोजकको रुपमा मुकन्दसेन मौलाकालिका होटल व्यवसायी संघ गैंडाकोट रहेको छ ।

चैत २४ र २५ गते होटल व्यवसायीहरु तथा त्यसमा काम गर्ने कामदारहरुलाई स्वच्छ र पर्यटकमैत्री सेवा प्रवाह सम्बन्धी दुई दिनको आवासीय तालिम कार्यक्रमको आयोजना गरिएको होटल व्यवसायी संघ गण्डकी प्रदेशका अध्यक्ष अर्जुन चोखालले जानकारी दिए ।

तालिममा करिडोर अन्तर्गत गैंडाकोट, बुलिङटार, बौदीकालीका गाउँपालिका लगायत नवलपुर जिल्लाभरीका होटल तथा पर्यटन व्यवसायीहरु र कामदारहरु समेत गरी ७० जनाको सहभागिता रहनेछ।

सहभागीहरुलाई खाद्य स्वच्छता, सरसफाई र पोसाक, पर्यटकमैत्री व्यवहार तथा आचरण, व्यवसायमा प्रविधिको प्रयोग, व्यवसायी र कर्मचारीबीचको सम्बन्ध, व्यवसायको प्रचारप्रसार र प्रबर्द्धन, स्थानीय उत्पादनको व्यावसायिकरण लगायतका विषयहरुमा तालिम प्रदान गरिने आयोजकले जनाएको छ ।

तालिमको प्रमुख प्रशिक्षकमा नेपाल टुरिजम एण्ड होटल म्यानेजमेन्ट कलेज पोखराका प्रिन्सिपल प्रकाश रेग्मी रहनेछन्। साथै प्रशिक्षकहरूमा खाद्य प्रविधि तथा गुण नियन्त्रण कार्यालय तनहुँका प्रमुख ज्योती आचार्य र नेपाल पर्यटन बोर्ड गण्डकी प्रदेश कार्यालयका अधिकृत कुन्दन मिश्र लगायतका बिषय बिज्ञहरू रहनेछन्। कार्यक्रमको उद्घाट गैँडाकोट नगरपालिकाका नगर प्रमुख मदनभक्त अधिकारीले गर्ने कार्यक्रम रहेको छ भने चैत्र २५ गते कार्यक्रमको समापन होटल व्यवसायी महासंघ नेपालका केन्द्रिय अध्यक्ष दिनेशकुमार चुकेले गर्ने कार्यक्रम रहेको चोखालले बताए।