वान एक्स बेटिङ्गमा संलग्न तीन जना एजेन्ट पक्राउ

२४७ पटक पढिएको

काठमाडौँ । विश्वमा सञ्चालन हुने विभिन्न खेलहरूमा सट्टाबाजी गर्न प्रयोग हुने बेटिङ एप वान एक्स बेटमार्फत सट्टाबाजी गराउन संलग्न रहेको आरोपमा तीन जना पक्राउ परेका छन् ।

पक्राउ पर्नेमा जिल्ला सर्लाही मलंगवा नगरपालिका-९ बस्ने ३१ वर्षीय सञ्जय कुमार साह र १९ वर्षीय रामजी साह तथा सोही नगरपालिकाको वडा नम्बर १० मा बस्ने ३० वर्षीय राकेश चौधरी रहेका छन् ।

वानएक्स बेटमा लगाउन रकम सङ्कलन गर्ने, गराउने कार्य गर्ने, क्रिप्टो करेन्सी ट्रेड गर्ने सक्रिय एजेन्टहरू रहेको सूचनाको आधारमा काठमाडौँ उपत्यका अपराध अनुसन्धान कार्यालयबाट खटिएको अनुसन्धान टोलीले गत चैत २९ गते सर्लाही जिल्लाको विभिन्न स्थानबाट उनीहरूलाई पक्राउ गरेको हो ।  उनीहरूको साथबाट प्रहरीले विभिन्न कम्पनीका ९ थान मोबाइल सेट, २१ थान सिमकार्ड, २ थान ल्यापटप, १ थान सीपीयू, नगद ६२ हजार रुपैयाँ, विभिन्न सहकारीको ११ थान पासबुक, १६ थान बैंकको चेकबुक र ११ थान डिपोजिट भौचर बरामद गरेको छ ।