नवलपुरमा एक युवतीको शव फेला, एकजना बेपत्ता

घर नजिकै धारामा नुहाउन गएका दुई युवती मध्ये एक जनाको शव फेला परेको छ भने एक जना बेपत्ता रहेको जिल्ला प्रहरी कार्यालय नवलपुरका प्रहरी नायब उपरीक्षक बेद बहादुर पौडेलले जानकारी गराउनुभयो।

बौदीकाली गाउँपालिका ३ थोत्रेनी बस्ने बर्ष १७ की लक्ष्मी सारू मगर र बर्ष १४ की नरिना सारू मगर बैशाख ८ गते नुहाउन भन्दै घर नजिकैको धारामा गएका थिए। नुहाउन गएका उनीहरू हिजोसम्म घर फिर्ता नआएपछि परिवारले खोजी गरिदिन प्रहरीलाई खबर गरेका थिए।

प्रहरीको टोलीले खोजी गर्दै जाँदा घर नजिकैको धारामा लुगा सुकाएको र कालिगण्डकी नदी किनारमा दुबै जनाको चप्पलसँगै केही पैसा ढुङ्गाले च्यापेर राखेको अवस्थामा फेला पारेको थियो। सो सामान भन्दा ३०० मिटर टाढा बर्ष १७ की लक्ष्मी सारूको शव फेला परेको छ भने उनी सँगै गएकी नरिना सारूको हालसम्म बेपत्ता रहेकोले खोजी कार्य जारि रहेको प्रहरीले बताएको छ।