संघीय अस्पतालका बिग्रिएका स्वास्थ्य उपकरण मर्मतको जिम्मा राष्ट्रिय आविष्कार केन्द्रलाई

११९ पटक पढिएको

काठमाडौँ,भदौ ५। स्वास्थ्य तथा जनसंख्या मन्त्रालयले संघीय अस्पतालका बिग्रिएका स्वास्थ्य उपकरण मर्मतको जिम्मा वैज्ञानिक महावीर पुन नेतृत्वको राष्ट्रिय आविष्कार केन्द्रलाई दिने भएको छ ।

स्वास्थ्य तथा जनसंख्यामन्त्री प्रदीप पौडेलको उपस्थितीमा बुधवार मन्त्रालय र केन्द्रबीच हस्ताक्षर भएको हो । कार्यक्रममा बोल्दै मन्त्री पौडेलले स्वास्थ्य क्षेत्रलाई व्यवस्थित गर्न उपकरणलाई पनि व्यवस्थित गर्नुपर्ने भएकाले राष्ट्रिय आविष्कार केन्द्रसँग सम्झौता गरेको बताउनु भयो । उहाँले सिमित श्रोत, साधनका कारण आवश्यकता अनुसारको उपकरणहरु खरिद गर्नसक्ने अवस्था नरहेको भन्दै भएका उपकरणहरुलाई बढी भन्दा बढी कसरी प्रयोगमा ल्याउन सकिन्छ ? भन्ने हेतुले आवष्कार केन्द्रसँग सम्झौता गरेको बताउनु भयो ।

उहाँले प्रयोगमा नआएर थन्किएका उपकरणहरुलाई मर्मत गरेर प्रयोगमा ल्याउनसके ठूलो धनराशीको खर्च पनि नहुने र राज्यको सिमित खर्चभित्र उपकरणहरु व्यवस्थापन हुने बताउनुभयो । उहाँले थन्किएको उपकरणहरुको व्यवस्थापन गर्नसके अस्पताल पनि सफा हुने र अस्पताललाई आवश्यक उपकरणहरु पनि प्राप्त हुने बताउनु भयो । मन्त्री पौडेलले संघीय १७ वटै अस्पतालमा उपकरण व्यवस्थापनमा महत्वपूर्ण काम हुने विश्वास व्यक्त गर्नुभयो ।
उहाँले भन्नुभयो, ‘स्वास्थ्य क्षेत्रलाई व्यवस्थित गर्न उपकरणलाई पनि व्यवस्थित गर्नुपर्ने हुन्छ । हामीसँग सिमित श्रोत, साधन छ, हामीले साधन, श्रोत बढाएर तत्काल हाम्रा आवश्यकताअनुसारको उपकरणहरु खरिद गर्नसक्ने अवस्था छैन । त्यसकारण अहिले हामीसँग भएका उपकरणहरुलाई बढी भन्दा बढी कसरी प्रयोगमा ल्याउन सकिन्छ ? प्रयोगमा नआएर थन्किएका उपकरणहरुलाई मर्मत गरेर प्रयोगमा ल्याउन सकियो भने त्यसमा धेरै ठूलो खर्च हुँदैन । राज्यको सिमति खर्चभित्र हामीले उपकरणहरु व्यवस्थापन गर्नका निम्ति हामीले यो काम शुरु गरेका हौँ । प्रयोगमा आउन नसक्ने, मर्मत हुन नसक्ने, अरु ढंगबाट उपयोग गर्न नसक्ने सामानहरु पनि अस्पताल भित्र छन् । अब त्यसलाई कवाडीको रुपमा व्यवस्थापन गर्नुपर्ने स्थिति छ । अहिले प्रयोगमा नआएर थन्किएका सामानभित्र प्रयोगमा आउनसक्ने सामान पनि छन् । प्रयोगमा आउन नसक्ने सामानहरु पनि छन् । ति सामानहरुलाई छुट्याएर हामीले तिनको त्यसअनुसार व्यवस्थापन गर्न जरुरी छ । हामीले यो काम गर्नसके अस्पताल सफा हुने, प्रयोगमा आउन नसकेका सामानहरुलाई प्रयोगमा ल्याउन सकियो भने कम खर्चमा अस्पताललाई उपकरणहरु प्राप्त हुन्छ । यो काम गर्न स्वयंसेवी गरिरहेको संस्थालाई रोज्यौँ । यसले संस्था र स्वदेशी वैज्ञानिकहरुलाई राज्यले विश्वास गरेको देखिन्छ ।’

कार्यक्रममा बोल्दै राष्ट्रिय आविष्कार केन्द्रका अध्यक्ष महावीर पुनले राष्ट्रिय आविष्कार केन्द्रले थप अर्को जिम्मेवारी पाएको बताउनु भयो । उहाँले संघीय सरकारअन्तर्गत रहेका अस्पतालहरुको बायोमेडिकल इक्वीपमेण्टहरु, बिरामी जाँच गर्ने उपकरणहरुको रेखदेख गर्ने, मर्मत गर्ने र त्यसको अवस्था बुझेर मर्मत गर्नसक्नेलाई मर्मत गर्ने बताउनु भयो । उहाँले आफूहरुको लागि यो ठूलो जिम्मेवारी भएको र इक्वीपमेण्टलाई राम्रो कण्डिसनमा राखेर बेलैमा उपलब्ध गराउनसके मान्छेको ज्यान बचाउन सकिने बताउनु भयो ।
उहाँले भन्नुभयो, ‘राष्ट्रिय आविष्कार केन्द्रले थप अर्को जिम्मेवारी पाएको छ । यो जिम्मेवारी भनेको संघीय सरकारअन्तर्गत रहेका अस्पतालहरुको बायोमेडिकल इक्वीपमेण्टहरु, बिरामी जाँच गर्ने उपकरणहरुको रेखदेख गर्ने, मर्मत गर्ने र त्यसको अवस्था कस्तो छ, नराम्रा छन् भने त्यसलाई लिस्ट बनाउने र राम्रो मर्मत गर्नसक्नेलाई मर्मत गर्ने जिम्मेवारी पाएको छ । यो ठूलो जिम्मेवारी हो । यो भनेको मान्छेको स्वास्थ्यसँग सम्बन्धित कुरा हो । इक्वीपमेण्टलाई राम्रो कण्डिसनमा राखेर बेलैमा उपलब्ध गराउनसके मान्छेको ज्यान बचाउन सक्छ । लाखौँ मान्छेले यसबाट सेवा लिन सक्छन् । हामीले हाम्रो क्षमताले सकेसम्म इमान्दारीपूर्वक गर्नेछौँ।’

मन्त्रालयका तर्फबाट गुणस्तर मापन तथा नियमन महाशाखा प्रमुख डा. मदन उपाध्याय र केन्द्रका अध्यक्ष महावीर पुनले सम्झौतामा हस्ताक्षर गर्नुभयो । अस्पतालमा खेर गइरहेका उपकरण मर्मत गर्नका लागि सघाउन मन्त्री पौडेलले केही दिनअघि पुनसँग आग्रह गर्नुभएको थयो । त्यसलगत्तै मन्त्रालयले उनी नेतृत्वको केन्द्रसँग औपचारिक सम्झौता गरेको हो । अब केन्द्रले हाल मन्त्रालयअन्र्तगतका १७ अस्पतालमा बिग्रिएर रहेका स्वास्थ्य उपकरणको अवस्थाबारे जानकारी लिनेछ । त्यसपश्चात मर्मत सम्भव भएका सबै उपकरणको केन्द्रका प्राविधिकहरुले मर्मत गर्नेछन् । —न्युज एजेन्सी नेपाल