प्रकाश तिमी नपढेर हरायौ…!!

३९६ पटक पढिएको

सुवास पौड्याल

प्रकाश तिमी नपढेर हरायौ ।
म धेरै पढेर हराएँ ।।

तिमी आफन्तको साथ नपाएर हरायौ ।
म धेरैको साथ पाउँदा पाउँदै हराएँ।।

तिमी बाटो बिर्सिएर हरायौ ।
म बाटो थाहा पाउँदा पाउँदै त्यही बाटो बाटै हराएँ ।।

तिमी धनको खोजिमा हरायौ ।
म जागिरको जञ्जिरमै हराएँ।।

तिमी हिमाली एक गोर्खा जिल्लामा हरायौ ।
म हिमाल, पहाड, तराई ७७ जिल्लाबाटै हराएँ ।।

प्रकाश तिमीलाई त कसैले खोज्यो, देख्यो र भेट्टायो ।
मलाई त सबैले खोज्छ, देख्छ नजिक पर्छ तर भेट्टाउदैन ।।

चिन्ता नगर तिमी अन्जानमै हरायौ र पो भेटियौ ।
म त जानिजानि हराए, अनि अन्जान भएँ।।

प्रकाश तिमी ३ करोड नेपालीको मनमा छौ अब हराउँदैनौ।
म पनि ३ करोडमै हराएको छु र पनि भेटिदैन ।।

तिमीलाई देखेर संसार रोएको छ ।
तर म संसारले देख्ला कि भनेर एक्लै रोएको छु ।।

तिमी बाध्यताले हरायौ म सहरमा रहरले ।
तिमि अव हराउँदैनौ, म हराएको छैन र पनि भेटिदैन ।।

प्रकाश तिमी धन्य रहेछौ ।
त्यसैले तिमी पका होइनौ किरण हौ ।।
रोसनी हौ नयाँ युगको सुरुवाती हौ ।।।

अन्त्यमा, तिमीलाई हेर्ने कथाले भेटायो ।
मलाइ आफ्नै कथाले हराइदियो ।।

हाल: आन्तरिक राजश्व बिभाग, लाजिम्पाट काठमाडौँ