चितवन राइनोजको ट्यालेन्ट हन्ट भोलि र पर्सी कैलाशनगरमा हुँदै

९० पटक पढिएको

चितवन, कार्तिक ३०– नेपाल प्रिमियर लिग (एनपीएल)को फ्रेन्चाईज टिम ‘चितवन राइनोज’ले भोलि देखि दुई दिन ट्यालेन्ट हन्ट गर्ने भएको छ।

राइनोजले आज शुक्रबार एक विज्ञप्ती जारी गर्दै मंसिर १ र २ गते दुई दिन हुने जानकारी दिएको हो ।

भरतपुर–५ कैलाशनगरस्थित चितवन मेडिकल कलेज परिसरमा ट्यालेन्ट हन्ट कार्यक्रम आयोजना गरिएको छ । ट्यालेन्ट हन्टमा सहभागिताका लागि यसअघि नै खुला गरिएको अनलाइन फर्म मार्फत नाम दर्ता गराएका युवा खेलाडीहरु दुई दिनसम्म ट्यालेन्ट हन्टमा सहभागिता जनाउन सक्ने छन् । यसमा सहभागिताका लागि कुनै पनि खेलाडीको उमेर हदबन्दी लगाईएको छैन । जिल्ला र प्रदेशबाट विभिन्न प्रतियोगिता खेलेका खेलाडीहरुले सहजै ट्यालेन्ट हण्टमा सहभागिता जनाउन पाउने छन् ।

यस ट्यालेण्ट हण्टबाट हामीले दुई जना खेलाडीलाई छनोट गरिने चितवन राइनोजका प्रबन्ध निर्देशक आयुष न्यौपानेले जानकारी दिए । जसमध्ये आइकोनिक प्लेयर र अर्को वैकल्पिक खेलाडीको रुपमा दुई जना टिममा छनोट हुने उनले जानकारी दिए । ट्यालेन्ट हन्ट र समग्र टिमको बन्द प्रशिक्षणका लागि चितवन मेडिकल कलेज परिसर कैलाशनगरमै दुइ वटा टर्फ र एउटा सिमेन्टेड गरी ३ वटा पीचसहितको प्रशिक्षण नेट समेत निर्माण गरिएको जचितवन राइनोजले जनाएको छ ।

चितवनको मार्की प्लेयरमा नेपाली राष्ट्रिय टिमका अलराउण्डर कुशल मल्ल रहेका छन् भने मुख्य प्रशिक्षकमा नेपालका पूर्व प्रशिक्षक उमेश पटवाल रहेका छन् । राइनोजले प्रतियोगिताका लागि ५ जना विदेशी खेलाडी अनुबन्ध गरि सकेको छ ।