काठमाडौंबाट अर्घाखाँची जाँदै गरेको बस नवलपुरमा दुर्घटना, ४ घाइते

२६७ पटक पढिएको

मंसिर ९ गते,कावासोती- काठमाडौंबाट अर्घाखाँची जाँदै गरेको बस नवलपुरमा दुर्घटनामा परेको छ।

गएराती पौने ३ बजे पूर्व–पश्चिम राजमार्गअन्तर्गत नवलपुरको विनयी त्रिवेणी गाउँपालिका १ होङ्सी गेट नजिकै दुर्घटना हुँदा ४ जना घाइते भएका छन्।

लु २ ख २१४१ नं. को बस चालकले नियन्त्रण गुमाई दुर्घटना हुँदा ४ जना घाइते भएको जिल्ला प्रहरी कार्यालय नवलपुरका प्रहरी नायव उपरीक्षक जेसी शाहले बताए ।

दुर्घटनामा घाइते हुनेहरूमा अर्घाखाँची मालारानी ४ का ६३ वर्षीय शोभाखर खनाल, ७ का ३१ वर्षीय बसन्त घिमिरे, मदाने ८ का ६४ वर्षीय सरिता घिमिरे र सन्धीखर्क ८ का ६६ वर्षीया सुनितादेवी भुसाल रहेका छन्।

घाइतेहरुको मध्यविन्दु जिल्ला अस्पताल डण्डामा उपचार भइरहेको प्रहरीले जनाएको छ । बसमा ३४ जना यात्रु सवार रहेको बुझिएको छ। बस र चालकलाई प्रहरीले नियन्त्रणमा लिई थप अनुसन्धान भैरहेको बताएको छ।