नतिजा प्रकाशन र भर्ना अभियान नगर्न नेपाल शिक्षक महासंघ नवलपुरको निर्देशन

१८८ पटक पढिएको

नेपाल शिक्षक महासंघ नवलपुरले एक प्रेस विज्ञप्ती जारी गर्दै जिल्ला भरका सामुदायिक विद्यालयका प्रधानाध्यापकहरुलाई नतिजा प्रकाशन र भर्ना अभियान रोक्न निर्देशन गरेको छ ।

नेपाल शिक्षक महासंघ नवलपुरका अध्यक्ष चन्द्रदेव तिवारी, सह अध्यक्ष कृष्णचन्द्र गिरी र सचिव गिरीराज गिरीद्धारा जारी सयुक्त विज्ञप्तीमा चैत्र २० गतेदेखि काठमान्डौ केन्द्रित बृहत् शैक्षिक सडक आन्दोलन हालसम्म पनि जारी रहेको अवस्थामा नेपाल शिक्षक महासंघ राष्ट्रिय समितिको निर्देशनलाई अवज्ञा गर्दै केही विद्यालयहरूले नतिजा प्रकाशन गरेको, भर्ना अभियानका लागि घरदैलो शुरु गरेको खबरहरू सुन्नमा आएको भन्दै नतिजा प्रकाशन र भर्ना अभियान नगरी आन्दोलनमा सहभागी हुन निर्देशन जारी गरेको छ ।

विज्ञप्तीमा अगाडी भनिएको छ – नेपाल शिक्षक महासंघ राष्ट्रिय समितिद्वारा अर्को निर्देशन नआउँदा सम्मका लागि नतिजा प्रकाशन, नयाँ भर्ना अभियान लगायतका सम्पूर्ण शैक्षिक गतिविधिहरु स्थगित गरी काठमाण्डौ केन्द्रित सडक आन्दोलनमा जिल्लाका सम्पूर्ण प्रधानाध्यापकज्यूहरु, शिक्षक तथा विद्यालय कर्मचारीहरूलाई उपस्थितका लागि नेपाल शिक्षक महासंघ नवलपुर आग्रह गर्दछ ।

विज्ञप्तीमा अहिलेसम्म यस आन्दोलनमा सहभागी सम्पूर्ण प्रधानाध्यापकज्यूहरू, शिक्षक तथा विद्यालय कर्मचारीज्यूहरूप्रति धन्यवाद दिदै आन्दोलनमा सहयोग गर्न विद्यालय व्यवस्थापन समितिहरु, शिक्षक अभिभावक संघहरु, अभिभावकज्यूहरू, विद्यार्थीहरू तथा सम्पूर्ण शैक्षिक सरोकारवालाहरूमा अपिल समेत गरेको छ ।