उत्तरपुस्तिका सच्याएर छोरी पास गराउने लोकसेवाका अधिकृतलाई ६ महिना कैद

२२५ पटक पढिएको

काठमाडौं, असार २९ । उत्तरपुस्तिका सच्याएर छोरीलाई पास गराएको अभियोग लागेका लोक सेवा आयोगका शाखा अधिकृत मिमबहादुर शाही दोषी ठहर भएका छन् ।

शाहीलाई विशेष अदालतले भ्रष्टाचारको आरोपमा दोषी ठहर गरेको हो । उनलाई विशेष अदालतका सदस्यहरु यमुना भट्टराई, शालिग्राम कोइराला र डा. खुसीप्रसाद थारुको इजलासले ६ महिना कैद र २० हजार रुपैयाँ जरिवाना हुने आदेश गरेको छ ।

उनले नेपाल बायुसेवा निगमको परीक्षामा सामेल छोरीको उत्तरपुस्तिकमा सच्याएर पास गराएका थिए । बस्तुगत उत्तरपुस्तिका सच्याएर उनले पछि केरमेट गरेका थिए ।

छोरीले परीक्षा दिँदा शाखा अधिकृत शाही लोक सेवा आयोगको सुरक्षा निकाय तथा संगठित महाशाखा अन्तर्गत लिखित नतिजा तयारी शाखामा कार्यरत थिए ।

उनकी छोरीले नेपाल वायुसेवा निगमको सहायक चौथो (खरिदार सरहको) परीक्षा दिएकी थिइन् । उनले बस्तुगत प्रश्नका सबै ५० वटा प्रश्नहरु मिलाएकी थिइन् ।

उनले बदमासी गरेको थाहा पाएपछि लोकसेवा आयोगले कार्यदल बनाएको थियो । कार्यदलले उत्तरपुस्तिका परीक्षणका लागि राष्ट्रिय विधिविज्ञान प्रयोगशालामा पठाएको थियो । घटनामा छोरीको भूमिका नदेखिएको भन्दै लोकसेवाले उनको नाम गोप्य राखेको थियो ।

प्रयोगशालाले बस्तुगत उत्तर लेख्ने क्रममा पछि अक्षर थपिएको भनी प्रतिवेदन दिएको थियो । प्रतिवेदन पाएपछि लोकसेवा आयोगले मिमबहादुरकी छोरीको सबै प्रक्रिया रद्द गरेको थियो ।

लोकसेवाले अधिकृत शाहीलाई ५ वर्ष ग्रेड र बढुवा पनि रोक्का गरेको थियो । यसवारे उजुरी परेपछि अख्तियारले छानबिन गरेर विशेष अदालतमा मुद्दा दायर गरेको थियो ।