घोराही सिमेन्टको आईपीओ बाँडफाँट, भाग्यमानीले पाए ७० कित्ता सेयर

१८१ पटक पढिएको

काठमाडौं । घोराही सिमेन्ट इण्डष्ट्री लिमिटेडको साधारण शेयर (आईपीओ) आज बाँडफाँट गरिएको छ । कम्पनीको शेयर निष्काशन तथा बिक्री प्रबन्धक नविल इन्भेष्टमेन्ट मर्चेन्ट बैंकिङ्गको कार्यालयमा आज दिउँसो शेयर बाँडफाँट भएको हो ।

कम्पनीका अनुसार ७० कित्तासम्म शेयर माग गर्ने आवेदकहरुले मागेजति शेयर पाएका छन् । १० कित्तादेखि ७० कित्तासम्म आवेदन दिएका ५ लाख ५३ हजार ४४ जनालाई माग अनुसार पाएका छन् । ८० देखि ३० हजार कित्तासम्म आवेदन दिएका ४ हजार ६५७ जनालाई ७० कित्ताका दरले शेयर पाएका छन् ।

कम्पनीले सर्वसाधारणमा प्रिमियम मूल्य सहित प्रतिकित्ता ४३५ मूल्यमा ६९ लाख ११ हजार ६७० कित्ता आईपीओ बिक्री गरेको थियो । आईपीओमा कुल ५ लाख ८१ हजार ५४६ वटा आवेदन मार्फत १ करोड ३ लाख २४ हजार २६० कित्ता सेयरको खरिद माग भएको थियो । जसमध्ये २३ हजार ८४५ वटा आवेदन मार्फत परेको २५ लाख ३० हजार ५५० कित्ता रद्द भएको थियो भने बाँकी रहेको ५ लाख ५७ हजार ७०१ वटा आवेदन मार्फत माग भएको ७७ लाख ९३ हजार ७१० कित्ताको माग सदर भएको थियो ।

हाल कम्पनीले दाङ जिल्लामा रहेको सिमेन्ट तथा क्लिंकर उद्योगबाट नवीनतम प्रविधि प्रयोग गरी सिमेन्ट तथा क्लिंकर उत्पादन गरिरहेको छ । कम्पनीले नेपालमा प्रसिद्ध सगरमाथा ब्रान्डअन्तर्गत क्लिंकर तथा ओपिसी र पिपिसी सिमेन्टको उत्पादन तथा विक्री वितरण गरिरहेको छ ।