भोलिदेखि नवलपुरका एकलाख २२ हजार बालबालिकाहरुलाई दादुरा-रुवेला विरुद्धको खोप लगाईँदै

२०२ पटक पढिएको

गैँडाकोट । नवलपुरका एकलाख २२ हजार बालबालिकाहरुलाई भोलिदेखि दादुरा- रुवेला विरुद्धको खोप लगाईने भएको छ ।

९ महिना पुरा भै १५ वर्ष उमेर नपुगेका करिव एकलाख २२ हजार बालबालिकाहरुलाई दादुरा- रुवेलाको खोप लगाइने जिल्ला स्वास्थ्य कार्यालय नवलपुरका प्रमुख मुक्तिनाथ भट्टराईले बताउनुभयो।

फागुन १३ गतेदेखि  २० गतेसम्म र फागुन २० गतेदेखि  २७ गतेसम्म दुई चरणमा दादुरा – रुवेला विरुद्धको खोप लगाउने कार्यक्रम रहेको छ। पहिलो चरणममा भोलिदेखि जिल्लाको गैँडाकोट नगरपालिका, बुलिङटार गाउँपालिका र बौदीकाली गाउपालिकाका बालबालिकाहरुलाई खोप लगाइँदैछ।

दोस्रो चरणमा देवचुली नगरपालिका, कावासोती नगरपालिका, मध्यविन्दु नगरपालिका, हुप्सेकोट गाउपालिका र विनयी त्रिवेणी गाउपालिकामा खोप लगाउने कार्यक्रम छ ।

जिल्लाभर सातसय स्वास्थ्यकर्मी (खोप कार्यकर्ता) खटाएको छ भने एकहजार चारसय जना स्वयंमसेवकलाई तालिम दिएर तयारी अवस्थामा राखिएको छ ।

दादुरा–रुबेला खोप नलगाएमा अन्धोपन हुने, पखाला लाग्ने, कान पाक्ने, न्यूमिनिया हुने इन्सेफलाइटिस हुने, कम्पन्न हुने तथा बालबालिकाको मृत्युसमेत हुनसक्ने स्वास्थ्य कार्यालयले आग्रह गरेको छ ।