गैंडाकोटवासीलाई चितवन मेडिकल कलेजमा उपचार गर्दा ५० प्रतिशत छुट

६६१ पटक पढिएको

अनिता गैरे– गैंडाकोट नगरपालिका र चितवन मेडिकल कलेज (सिएमसी) बीच गैंडाकोटवासीको स्वास्थ्य उपचारमा छुट सम्बन्धी सम्झौता भएको छ ।

आज मंगलबार चितवन मेडिकल कलेज (सिएमसी) मा गैंडाकोट नगरपालिकाका नगर प्रमुख मदन भक्त अधिकारी र सिएमसीका निर्देशक प्राध्यापक डा. दयाराम लम्सालले सम्झौता पत्रमा संयुक्त रुपमा हस्ताक्षर गर्नुभयो।

गैंडाकोट नगरवासीले सिएमसीमा उपचार गर्दा होल बडी चेकअपमा ५० प्रतिशत, औषधि खरिदमा ७ प्रतिशत र अन्य उपचारमा २५ प्रतिशत छुटको व्यवस्था गरिएको सम्झौता पत्रमा उल्लेख छ ।

यो सम्झौता मंसिर ४ अर्थात् आजबाट लागू भई २०८२ मंसिर ३ गतेसम्म लागु हुनेछ । यस्तै नगर प्रमुखको सिफारिस अन्य सेवाहरूमा १० प्रतिशत छुट र सिएमसी क्यान्सर इन्टीच्यूटमा संचालित सिटिइभिटीको पढाईमा विद्यार्थीलाई १० प्रतिशत व्यवस्था गरिएको छ ।

कार्यक्रमलाई सम्बोधन गर्दै नगर प्रमुख अधिकारीले नगरवासीलाई विशिष्ट स्वास्थ्य सेवा प्रदान गर्ने उदेश्यले सिएमसीसँग छुटसहितको सम्झौता गरिएको स्पष्ट पार्नुभयो।

अब यो सम्झौतासँगै सिधै छुट उपलब्ध हुनेभएकोले विरामीलाई ठूलै राहात पुग्ने उहाँले बताउनुभयो।

छुट सेवा लिनका लागि नगरपालिकाले जारी गरेको कार्ड लिएर अस्पतालमा जानुपर्ने सम्झौतापत्रमा उल्लेख छ। कार्ड उपलब्ध नभएसम्म गैंडाकोट गरपालिकाबाट सिफारिस लिएर जानुपर्ने छ । थप जानकारीका लागि गैंडाकोट नगरपालिकामा सम्पर्क गर्न सक्ने अधिकारीले बताउनुभयो।