प्रयागराज महाकुम्भमा भागदौड, १४ जनाको मृत्यु

९३३ पटक पढिएको

काठमाडौँ, माघ १६ । भारतको प्रयागराजमा चलिरहेको महाकुम्भ क्षेत्रमा भागदौड मच्चिएको छ ।

गएराति २ बजेको समयमा एक्कासी भागदौड मच्चिएको हो । जसका कारण कम्तीमा १४ जनाको मृत्यु भएको छ भने ५० भन्दा बढी घाइते भएको बताइएको छ ।

यद्यपि अहिलेसम्म स्थानीय प्रशासनले यसबारे विवरण सार्वजनिक गरेको छैन । भागदौडपछि प्रशासनको अनुरोधअनुसार सबै १३ अखाडामा आज मौनी अमावश्याको अमृत स्नान रद्द गरिएको छ ।

मिडिया रिपोर्टअनुसार अफबाह फैलाउँदै भागदौड मच्चिएको थियो । केही महिलाहरु जमीनमा लडेकामा अरुले उनीहरुलाई कुल्चदै अगाडि बढेका थिए ।

घटनापछि मुख्यमन्त्री योगी आदित्यनाथले महाकुम्भमा आएका भक्तालुसँग विनम्र अनुरोध गर्दै गंगाको जुन घाट नजिक रहेका छन् त्यहीँ स्नान गर्न भनेका छन् ।

उनले कुनै पनि अफबाहको पछि नलाग्नसमेत आग्रह गरेका छन् । यसअघि मंगलबार योगी आदित्यनाथले सबै श्रद्धालुलाई मौनी अमावश्यामा शामेल हुन आग्रह गरेका थिए ।

मौनी अमावश्याको स्नान भएका कारण करिब पाँच करोड श्रद्धालु सहरमा रहेको अनुमान छ ।

प्रशासनका अनुसार संगमसमेत ४४ घाटमा राति अबेरसम्म ८ देखि १० करोडले डुबकी लगाउने अनुमान गरिएको थियो । तर अप्रिय घटना भएसँगै श्रद्धालुलाई अमृत स्नान गर्न रोक लगाइएको छ ।