प्रदेश एवं स्थानीय शासन सुदृढीकरण कार्यक्रमका लागि अमेरिकी सहयोग प्राप्त भएको छैन : अर्थ मन्त्रालय

१३१ पटक पढिएको

काठमाडौँ- अर्थमन्त्रालयले अमेरिकी साहायतमा बजेट प्रणालीमार्फत सञ्चालन भएका कार्यक्रमहरु रोकिएको दोहोराएको छ ।

अमेरिकी सहयोग नियोग (USAID) बाट सञ्चालित कार्यक्रमहरुको सम्बन्धमा सञ्चार माध्यम तथा सामाजिक सञ्जालहरुमा आएका समाचार र टिप्पणीप्रति यस मन्त्रालयको ध्यानाकर्षण भएको जनाउँदै राष्ट्रपतिको आदेशले बजेट प्रणालीमार्फत सञ्चालन भइरहेका शिक्षा, स्वास्थ्य, कृषि र तथ्यांकसँग सम्बन्धित चारवटा कार्यक्रमहरु ९० दिनका लागि रोकिएको जानकारी गराएको हो ।

‘’नेपालको आर्थिक, सामाजिक तथा पूर्वाधार क्षेत्रको विकासमा मित्रराष्ट्र संयुक्त राज्य अमेरिकाले विगत लामो समयदेखि सहयोग गर्दै आएको छ । अमेरिकी सहयोग नियोग (USAID) बाट नेपालमा सन् १९५१ देखी निरन्तर रुपमा अनुदान सहायता मार्फत विभिन्न कार्यक्रम सञ्चालन हुँदै आएको छ ।

यसैबीच, अमेरिकी राष्ट्रपतिबाट २० जनवरी २०२५ मा जारी कार्यकारी आदेशवमोजिम नेपाल सरकारको बजेट प्रणालीमार्फत सञ्चालन भइरहेका शिक्षा, स्वास्थ्य, कृषि र तथ्यांकसँग सम्बन्धित चारवटा कार्यक्रमहरु ९० दिनका लागि रोकिएको जानकारी प्राप्त भएको छ । अर्थमन्त्रालयले जारी गरेको विज्ञप्ति उल्लेख छ ।

यसै गरी मन्त्रायलले जैविक विविधता, प्रदेश एवं स्थानीय शासन सुदृढीकरण कार्यक्रम र जलवायु उत्थानशीलका लागि कुनै सहयोग रकम प्राप्त नभएको स्पष्ट पारेको छ ।जैविक विविधता, प्रदेश एवं स्थानीय शासन सुदृढीकरण कार्यक्रम र जलवायु उत्थानशील नगरपालिका सेवा कार्यक्रम गरी तीनवटा कार्यक्रमहरु डिजाइनमा रहेको भन्दै डिजाइनमा रहेका कार्यक्रमको सहयोग प्राप्त नभएको मन्त्रालयले स्पष्ट पारेको छ ।

‘’जैविक विविधता, प्रदेश एवं स्थानीय शासन सुदृढीकरण कार्यक्रम र जलवायु उत्थानशील नगरपालिका सेवा कार्यक्रम गरी तीनवटा कार्यक्रमहरु डिजाइनको क्रममा रहेकोमा उक्त आदेशबाट यी कार्यक्रमहरु समेत रोकिएको अवस्था छ । डिजाइनको क्रममा रहेका उल्लेखित कार्यक्रमको लागि सम्झौता नभइसकेको हुँदा कुनै सहयोग प्राप्त नभएको व्यहोरा जानकारी गराइन्छ’’, विज्ञप्तिमा भनिएको छ ।