मकवानपुरको भिमफेदीमा मिनीबस दुर्घटना : ६ जनाको मृत्यु

१८० पटक पढिएको

हेटौडा । मकवानपुर जिल्लाको भिमफेदी गाउँपालिकाको जुरीखेतमा मिनीबस दुर्घटना हुँदा ६ जनाको मृत्यु भएको छ । बस सडकबाट तल खस्दा ६ जनाको घटनास्थलमै मृत्यु भएको जिल्ला प्रहरी कार्यालय मकवानपुर स्रोतले जानकारी दिएको हो ।

प्रहरीका अनुसार काठमाडौंबाट हेटौंडाका लागि छुटेको बा ३ ख ७८५८ नम्बरको मिनिबस भीमफेदीको आरोलोमा सडकबाट करिब ६० मिटर तल खसेको हो ।

दुर्घटनामा गम्भीर घाईते भएकालाई काठमाडौं पठाईएको छ भने सामान्य घाइतेहरुलाई उपचारका लागि हेटौंडा लगिएको छ ।

केही यात्रुहरु बसभित्र थिचिएको अवस्थामा रहेको आशंका गरिएको छ । बसमा कति यात्रु थिए भन्ने अझसम्म खुलिसकेको छैन् । दुर्घटनास्थलमा अहिले पनि उद्धार कार्य जारी रहेको छ । दुर्घटना बारेमा थप विवरण आउँन बाँकी रहेको छ ।