भ्रष्टाचार आरोपमा कन्चनपुरका प्रमुख मालपोत अधिकृतसहित ३७ जनाविरुद्ध मुद्दा दायर

२२१ पटक पढिएको

काडमाडौं । अख्तियार दुरुपयोग अनुसन्धाग आयोगले कन्चनपुरका प्रमुख मालपोत अधिकृतसहित ३७ जना विरुद्ध मुद्दा दायर गरेको छ । आयोगले बुधबार विशेष अदालत काठमाडौंमा उनीहरुविरुद्ध मुद्दा दायर गरेको हो ।

अख्तियारका अनुसार तत्कालीन महेन्द्रनगर नगर विकास समितिका तत्कालीन अध्यक्ष गोपाल रसाइली, पल्टु राना, पुष्कल चौधरी तथा मालपोत कार्यालय कन्चनपुरका तत्कालीन प्रमुख मालपोत अधिकृत र नापी कार्यालय कन्चनपुरका तत्कालीन प्रमुख नापी अधिकृतसमेत ३७ जनाविरुद्ध मुद्दा दायर गरिएको छ । गैरकानूनी लाभ तथा हानी पुर्याइ भ्रष्टाचार गरेको उनीहरुलाई आरोप रहेको छ ।

तत्कालीन महेन्द्रनगर नगर विकास समितिको स्वामित्वमा रहेको जग्गा गैरकानूनी तवरले लिज तथा बिक्री गरी सरकारी सार्वजनिक सम्पत्तिको हिनामिना गरी भ्रष्टाचार गरेको आयोगमा उजुरी परेको थियो । सोबारे अनुसन्धान हुँदा तत्कालीन नगर विकास समितिको स्वामित्वमा रहेको जग्गा व्यक्तिको नाममा हक हस्तान्तरण गर्दा अध्यक्षहरुको एकल तोक आदेशको आधारमा बोर्डको निर्णय नै नभएका तथा निर्णयमा उल्लेख नै नभएका व्यक्तिहरु समेतलाई जग्गा उपलब्ध गराएको देखिएको आयोगले जनाएको छ ।

तत्कालिन अध्यक्ष गोपाल रसाईलीसंग ८ लाख ५० हजार विगो माग गरिएको छ । त्यस्तै, तत्कालिन अध्यक्ष पल्टु रानासंग ३७ लाख ९२ हजार, तत्कालिन अध्यक्ष पुष्कल चौधरीसंग ३ लाख ७४ हजार ८८०, तत्कालिन सदस्य सचिव चन्द्रप्रसाद चौधरी ५ लाख १४ हजार ८७३ रुपैयाँ, तत्कालिन नायब सुब्बा पुष्पराज भट्टसंग ६३ लाख २२ हजार, तत्कालिन अमिन तुलादत्त जोबीसंग ४६ लाख ४२ हजार रुपैयाँ बिगो माग गरिएको छ ।

त्यस्तै, कञ्चनपुरको मालपोत कार्यालयका तत्कालिन मालपोत अधिकृत कृष्णकुमार निरौलासंग ८ लाख ५० हजार रुपैयाँ बिगोमा माग गरिएको छ भने तत्कालिन मालपोत अधिकृत विशन सिंह थापासंग ४६ लाख ८१ हजार ७५३ रुपैयाँ बिगो माग गरिएको छ । यस्तै, तत्कालिन मालपोत अधिकृत अशोक कुमार भण्डारीसंग १६ लाख ४० हजार ५२० र तत्कालिन मालपोत अधिकृत शंकर बहादुर विष्टसंग १६ लाख ८० हजार रुपैयाँ बिगो माग गरिएको छ ।

आयोगका अनुसार मालपोत कार्यालयका शाखा अधिकृत दलजित भट्टसंग २१ लाख ११ हजार, शाखा अधिकृत जयबहादुर विष्टसंग १७ लाख ३२ हजार ४३६, शाखा अधिकृत घनश्याम दत्त विष्टसंग एक लाख ८७ हजार ४४० बिगो माग गरिएको छ । यसका साथै सोहि मुद्दामा तत्कालिन नायब सुब्बा गणेश बहादुर ऐरसंग ४ लाख २५ हजार, नयनसिंह कुवरसंग १० लाख ५० हजार, भिमसिंह रावलसंग ८ लाख २० हजार २६० बिगो माग गरिएको छ ।

त्यस्तै, तत्कालिन खरिदारसहित विभिन्न व्यक्तिहरुसंग पनि बिगो माग गरिएको आयोगले जनाएको छ ।