डोटीमा निर्वाचन सामग्री र कर्मचारी बोकेको जीप दुर्घटना

१६१ पटक पढिएको

डोटी । मंसिर ४ गते हुने निर्वाचनका लागि निर्वाचन सामग्री र कर्मचारी बोकेको जीप दुर्घटना भएको छ । डोटीको बडीकेदार गाउँपालिका-५ मार्कोट स्वास्थ्य चौकीमा रहेको मतदान केन्द्रमा खटिएका कर्मचारी र सामग्री बोकेको बा २ झ २२३५ नं. को जीप अत्तरकाडाँ भन्ने ठाउँ नजिक दुर्घटना भएको जिल्ला प्रहरी कार्यालय डोटीका सूचना अधिकारी प्रहरी नायव उपरीक्षक (डीएसपी) भोलाप्रसाद भट्टले जानकारी दिए ।

डीएसपी भट्टका अनुसार मार्कोट मतदान केन्द्र (क) का मतदान अधिकृत दिनेश सिंह रैखोला घाइते भएका छन् । रैखोला खुटिया बिपिनगर दिपायल सडक आयोजना कार्यालय विपिनगरका ईन्जिनियर हुन् ।

भट्टले तीनवटा मतपेटिका समेत चर्केको जानकारी दिए । प्रहरी नायव उपरीक्षक भट्टले भने, ‘चोट धेरै छैन, सुरक्षाकर्मी र अन्य कर्मचारीहरुलाई पनि सामान्य चोट लागेको छ, उहाँहरु अर्को गाडी लिएर मतदान केन्द्रमा पुगिसक्नु भएको छ ।’

मतदान अधिकृत रैखोलाले आफ्नो कम्मरमा चोट लागेका कारण मतदान गराउन नसक्ने भनेकाले उनको ठाउँमा अर्को व्यक्ति पठाउने तयारी भएको जिल्ला निर्वाचन कार्यालय डोटीका सूचना अधिकारी दलवहाहदुर मलासीले जानकारी दिए ।