चितवन महोत्सव आजदेखि सुरु हुँदै, अर्थमन्त्री विष्णु पौडेलले उद्घाटन गर्ने

उद्योग वाणिज्य संघ चितवनको आयोजनामा संचालन हुन लागेको महोत्सवको उपप्रधान तथा अर्थमन्त्री विष्णुप्रसाद पौडेलले उद्घाटन गर्ने कार्यक्रम रहेको आयोजकले जनाएको छ ।

महोत्सवमा कृषि,मेड इन नेपाल, अटो, इलेक्ट्रोनिक र आईटी, बगैँचा, कृषि परिसर, पोल्ट्री परिसर, बाल उद्यान, गार्मेन्ट सामग्रीसहितका कक्ष का छुट्टैछुट्टै स्टल तथा परिसरहरू रहेको महोत्सव मूल आयोजक समिति संयोजक एवं उद्योग वाणिज्य संघ चितवनका अध्यक्ष चुननारायण श्रेष्ठले बताए ।

त्यस्तै महोत्सवमा खेलकुद, जलयात्रा, स्वास्थ्य सेवा, आदिवासी जनजातिको भेषभूषा र कला संस्कृति झल्किने मनोरञ्जनात्मक कार्यक्रम, कृषिउपज प्रदर्शनी र बाल उद्यान राखिएका छन् ।

चितवनको आर्थिक, सामाजिक र सांस्कृतिक रुपान्तरणका लागि यसपटक तोरी र मौरीलाई प्रबर्द्धन गर्नेगरी तोरीबारी सहितको मौरीको मस्कट महोत्सवभित्र राखिएको छ। महोत्सव आगामी माघ ४ गतेसम्म चल्नेछ ।